NÝTING SJÁVARAFLA, VINNSLA OG MARKAÐIR

ÁBYRG NÝTING AUÐLINDA

Verndun auðlinda sjávar ásamt hagkvæmri nýtingu þeirra eru hornsteinar í virkri stjórnun fiskveiða.

Ábyrg nýting er nátengd þessum grunnreglum en auk virkrar fiskveiðistjórnar felst ábyrgðin í skynsamlegri ráðstöfun og vinnslu sjávaraflans, þ.e. nýtingu án sóunar og brottkasts og með vinnslu til manneldis en einnig í mjöl- og lýsisvinnslu. Suma fiskistofna er ekki hægt að nýta beint til vinnslu matvæla af hagkvæmniástæðum. Vinnsla þeirra getur t.d. verið of kostnaðarsöm miðað við markaðsverð afurðanna.

Lög um stjórn fiskveiða Íslendinga fela ekki í sér neinar reglur um ráðstöfun afla en brottkast er ólöglegt. Ráðstöfun aflans lýtur almennum markaðslögmálum og er mjög mismunandi frá einni tegund sjávarfangs til annarrar.

Á eftirfarandi síðu er að finna ítarlegri upplýsingar um ráðstöfun afla af Íslandsmiðum eftir meginflokkum sjávarfangs og aðalvinnslugreinum.

Ráðstöfun afla af Íslandsmiðum

VINNSLA OG MARKAÐIR

Íslenskar sjávarafurðir bera þess merki að hinn alþjóðlegi markaður er afar fjölskrúðug blanda hefðbundinna afurða og annarra nýrri sem aftur lýsa því hvað "matseðillinn" er fjölbreyttur frá einni þjóð til annarrar. Hinar hefðbundnu sjávarafurðir eru saltaðar og verkaðar fyrir markaði sem kunna jafnt að meta þær til daglegrar neyslu og hátíðabrigða en markaðir fyrir hraðfrystar og ferskar afurðir kunna að meta ferskleikann sem neytendur setja í samband við heilsusamlegan kost og jafnframt bragðgóðan.

Hvort sem um er að ræða hinar hefðbundnu afurðir eða hinar nýrri gildir að við framleiðslu íslenskra sjávarafurða er alltaf notuð nýjasta vinnslutækni og gæðamálunum sinnt. Markaðir nútímans ætlast til þess og samþykkja ekki annað.

Á eftirfarandi síðum er að finna ítarlegri upplýsingar um vinnslu íslenskra sjávarafurða og markaðsmál.

Sjávarafurðir fyrir heiminn
Við sem trúum því að íslenskar sjávarafurðir séu þær bestu í heimi erum ánægðust ef við getum selt þær mestmegnis á alþjóðlegum mörkuðum. Ekki er þetta vegna göfuglyndis eða sakir þess að Íslendingar kunni ekki að meta fiskinn sinn sjálfir. Þvert á móti eru Íslendingar í hópi mestu fiskneytenda í heimi, þ.e.a.s. miðað við fólksfjölda, en þar sem Íslendingar eru aðeins 300.000 að tölu er okkur það ágætlega að skapi að selja mestallar afurðir okkar á alþjóðlegum mörkuðum svo að aðrir jarðarbúar geti notið þeirra með okkur.

fisheries@fisheries.is

Sjávarútvegsráðuneytið