Frysting
Söltun
Ferskfiskur
Fiskimjöl
Fiskeldi
Gæðaeftirlit
Rannsóknir



Aðalsíða
Senda póst

FERSKUR FISKUR - VINNSLA OG MARKAÐIR

Ferskar og ísaðar fiskafurðir hafa undanfarin ár verið um 15% af verðmæti útfluttra sjávarafurða en náðu 18% árið 2005. Útflutningurinn byggist á sölu ferskra flaka sem mest eru flutt út flugleiðis svo og sölu á heilum ísuðum fiski sem fluttur er sjóleiðis.  Ferskur fiskur er kældur í öllum flutningum.

Nútímatækni í flutningum gerir það mögulegt að flytja ferskan fisk frá Íslandi til allra helstu ferskfiskmarkaða. Kaupendurnir eru smásöluverslanir og veitingahús í Evrópu og Norður-Ameríku sem kunna að meta stöðugleikann í aðföngum, ferskleikann og aðra mikilvæga gæðaþætti.

Að magninu til er útflutningurinn mest heill eða slægður fiskur í ís (ísfiskur) en á undanförnum árum hefur salan á ferskum flökum sem flutt eru út með flugi aukist mikið. Verðmæti útflutnings ferskra flaka er orðið mun meira á síðustu árum en verðmæti ísfiskútflutningsins. Aðallega eru það afurðir þorsks, ýsu, karfa, steinbíts, ufsa og skarkola sem fluttar eru út ferskar.

Ferskfiskvinnsla
Eftir að búið er að slægja og þvo fiskinn er hann ísaður og honum haldið kældum á sjó og í landi til að varðveita hráefnisgæðin. Hann er síðan þveginn aftur, hausaður og vélflakaður. Flökin eru snyrt, skorin í bita og þeir stærðarflokkaðir áður en þeim er pakkað með sérstökum kælimottum í kassa úr einangrunarplasti.

Ferskfiskútflutningur með flugi

Markaðir
Markaðir fyrir heilan ísaðan fisk eru nær eingöngu í löndunum í norðvestanverðri Evrópu en þangað er styst siglingaleið frá Íslandi. Fersk flök eru flutt með flugi, mest til  Bretlands, Frakklands, Belgíu og Þýskalands en einnig í talsverðum mæli til Bandaríkjanna. Þorskur er aðallega fluttur til Bretlands og Frakklands, ýsa til Bandaríkjanna og Bretlands en karfi til Þýskalands og Frakklands. 

Kökuritið sýnir hlutfallslegt verðmæti útflutnings ferskra flaka árið 2005 skipt eftir aðalmarkaðssvæðum.