Hvalir



Aðalsíða
Senda póst

UFSI Pollachius virens

Ufsinn veiðist aðallega undan suður og vesturströnd landsins. Aflinn dreifist nokkuð jafnt yfir árið. Ufsinn er botnfiskur en hefur þó að nokkru leyti líka eðli uppsjávarfisks og algengt er að hann finnist allt frá yfirborði sjávar og niður á 200 m dýpi. Hann heldur sig við sjávarhita um 4-12°C. Ufsinn ferðast í torfum í ætisleit og lifir á loðnu, öðrum smáfiski og dýrasvifi. Hann hrygnir aðallega í febrúar á Selvogsbanka og Eldeyjarbanka undan suðvesturlandi.

Ufsi er aðallega veiddur í botnvörpu og net. Venjulega er hann 4-7 ára er hann veiðist og vegur þá 2-4 kg.

Veiðistofn ufsa (4 ára og eldri) var í upphafi ársins 2007 talinn vera um 250.000 tonn og hrygningarstofninn nálægt 140.000 tonnum.

Árlegur ufsaafli undanfarin 30 ár hefur verið bilinu 30.000-100.000 tonn en að meðaltali nálægt 60.000 tonnum.

Ufsaaflinn á Íslandsmiðum var 76.000 tonn árið 2006 eða hinn mesti í 14 ár. Heildaraflamark fyrir fiskveiðiárið 2006/2007 var 80.000 tonn. Á nýju fiskveiðiári 2007/2008 er aflamarkið 75.000 tonn en Hafrannsóknastofnun mælti með 60.000 tonna heildaraflamarki.

Línuritið sýnir þróun ufsaveiða síðan 2001 ásamt aflamarki sem Hafrannsóknastofnunin mælti með og aflamarkinu er sjávarútvegsráðuneytið setti sömu fiskveiðiár.  Rauðu súlurnar tákna ráðleggingar Hafrannsóknastofnunar, bláu súlurnar heildaraflamark og grænu súlurnar ársaflann. (Allar tölur eru í þúsundum tonna).
Ufsinn í uppáhaldi Ufsi af Íslandsmiðum var í miklu uppáhaldi hjá fólki á meginlandi Evrópu eftir síðari heimsstyrjöldina. Ufsaveiðar erlendra skipa við Ísland voru löngum miklu meiri en afli Íslendinga en það breyttist um 1970 þó að afli útlendinga hafi verið talsverður fram undir 1980.

Uppfært í júlí 2007