Hvalir



Aðalsíða
Senda póst

SKARKOLI, Pleuronectes platessa
SANDKOLI, Limanda limanda
SKRÁPFLÚRA, Hippoglossoides platessoides
ÞYKKVALÚRA, Microstomus kitt
LANGLÚRA, Glyptocephalus cynoglossus
LÚÐA, Hippoglossus hippoglossus

Auk grálúðu eru nokkrir flatfiskstofnar mikilvægir í sjávarútvegi landsmanna og ber helst að nefna skarkola, sandkola, skrápflúru, þykkvalúru, langlúru og lúðu. Allir þessir stofnar teljast fullnýttir og sett hefur verið árlegt heildaraflamark fyrir veiðarnar úr hverjum stofni.

Skarkoli Pleuronectes platessa

Skarkoli er algengur á grunnslóð allt í kringum landið en mest er af honum fyrir vestan- og sunnanverðu landinu. Mest af aflanum er 5-6 ára fiskur, 35-40 cm langur. Hann er aðallega veiddur í dragnót og botnvörpu.

Skarkolaaflinn var 6.400 tonn árið 2006. Sókn í skarkola er talin mikil og vísitala fyrir veiðistofninn fór ört lækkandi síðasta áratug en virðist heldur hafa hækkað síðan. Aflamarkið fyrir fiskveiðiárið 2007/2008 er 6.500 tonn en Hafrannsóknastofnun mælir með að aflinn verði takmarkaður við 5.000 tonn.

Línuritið sýnir þróun skarkolaafla síðan 2001 ásamt tillögum Hafrannsóknastofnunar um aflahámark og heildaraflamark sem ákveðið var af sjávarútvegsráðuneytinu. Rauðu súlurnar tákna ráðleggingar Hafrannsóknastofnunar, bláu súlurnar heildaraflamark og grænu súlurnar ársaflann. (Allar tölur eru í þúsundum tonna).

Sandkoli
Sandkolaaflinn var 1.100 tonn árið 2006. Sandkoli veiðist aðallega í dragnót á fremur takmörkuðu svæði undan suðvestur- og suðurströndinni. Heildaraflamarkið er 1.500 tonn fiskveiðiárið 2007/2008 en ráðgjöf Hafrannsóknastofnunar er 500 tonn.

Skrápflúra
Veiðar á skrápflúru hafa aðeins verið stundaðar hér við land í nokkur ár og er hún veidd í dragnót undan suðvestur- og suðurströnd landsins. Aflinn var 700 tonn árið 2006 en heildaraflamarkið er 1.000 tonn fiskveiðiárið 2007/2008. Hafrannsóknastofnun mælir með að afli skrápflúru verði takmarkaður við 500 tonn á fiskveiðiárinu.

Langlúra
Langlúruaflinn var 2.000 tonn árið 2006 og var mest veitt í dragnót sunnan- og vestanlands. Heildaraflamarkið er 2.400 tonn fyrir fiskveiðiárið 2007/2008 en ráðgjöf Hafrannsóknastofnunar er 2.000 tonn.

Þykkvalúra
Afli þykkvalúru var 2.700 tonn árið 2006 og hún er veidd í dragnót undan vestur- og suðurströndinni. Lítið er vitað um nýliðun og afrakstursgetu stofnsins. Hafrannsóknastofnun mælir með 1.600 tonna hámarksafla fiskveiðiárið 2007/2008 en heildaraflamarkið hefur verið ákveðið 2.200 tonn.

Lúða
Lúðuveiðar hafa verið stundaðar á Íslandsmiðum í aldaraðir, fyrst á handfæri og síðan á línu en nú er hún mest veidd í botnvörpu, á línu og í dragnót. Aflinn var aðeins 550 tonn árið 2006. Lúðustofninum hefur hrakað mjög hin síðari ár og viðkomubrestur virðist hafa orðið en mestar athuganir hafa verið gerðar á hinum yngri hluta stofnsins (smálúðu). Bein sókn í lúðu er þess vegna ekki lengur leyfð og er það í samræmi við ráðgjöf Hafrannsóknastofnunar en alltaf kemur nokkuð af lúðu með sem aukaafli. Stofnunin hefur einnig lagt til að gripið verði til annarra verndunaraðgerða, svo sem lokunar mikilvægra uppeldissvæða og að bannað verði að landa lúðu undir ákveðinni lágmarksstærð.