Lög og reglur
Rannsóknir
og stofnmat
Aflamark
Eftirlit og
framfylgd



Aðalsíða
Senda póst

EFTIRLIT OG FRAMFYLGD

Framfylgd laga um stjórn fiskveiða og reglugerða er tengjast fiskveiðistjórn er í flestum tilvikum í höndum Fiskistofu, sem er opinber stofnun er heyrir undir sjávarútvegsráðuneytið. Fiskistofa hefur einnig stöðugt eftirlit með því að ákvæðum þessara laga og reglugerða sé fylgt og beitir viðurlögum við brotum gegn þeim.

Íslenska landhelgisgæslan, sem heyrir undir dómsmálaráðuneytið, fylgist með veiðum skipa á Íslandsmiðum og svæðum sem lokuð eru fyrir veiðum. Hún hefur eftirlit með útbúnaði veiðarfæra, t.d. möskvastærð í netum svo að eitthvað sé nefnt.

Fiskistofa hefur víðtækt ábyrgðarsvið. Til viðbótar eftirliti með og framfylgd laga um fiskveiðistjórn annast hún einnig framfylgd laga og reglugerða er varða meðferð, vinnslu og dreifingu sjávarafurða og hún ber ábyrgð á að taka saman og miðla ýmsum upplýsingum um veiðar og vinnslu sjávarafla.

Fiskveiðistjórnunarsvið Fiskistofu gefur út leyfi til veiða í atvinnuskyni og úthlutar skipum aflamarki. Stofnunin skráir einnig kvótatilfærslur milli skipa og fylgist með því að skipin veiði ekki umfram aflaheimildir sínar. Þá safnar hún gögnum um afla og ráðstöfun hans og hefur eftirlit með því að afli sé löglega vigtaður og rétt skráður.

Allan afla íslenskra skipa, sem landað er á Íslandi, skal vigta og skrá hérlendis. Hafnaryfirvöld bera ábyrgð á að aflinn sé rétt vigtaður á löggiltar vogir en löggiltir vigtarmenn á þeirra vegum standa að vigtun og skráningum. Sumir vigtarmenn starfa þó hjá vinnslustöðvum sem hafa fengið leyfi til vigtunar á afla. Upplýsingar um landaðan afla berast Fiskistofu tvisvar á dag frá öllum hafnarvogum gegnum tölvukerfi sem nefnt er "Lóðsinn".

Afli vinnsluskipa er reiknaður þannig að afurðirnar eru vigtaðar á löggiltum vogum við löndun en síðan eru þær umreiknaðar í afla upp úr sjó með notkun nýtingarstuðla sem reiknaðir hafa verið út fyrir hverja tegund afurða og hverrar fisktegundar.

Í þeim tilvikum er íslensk skip sigla með aflann til löndunar í erlendum höfnum tíðkast að nota söluskýrslur er tilgreina verð og magn fisksins í stað vigtarskýrslna. Þessi gögn berast frá innflutningslandinu til Fiskistofu.

Eftirlitsmaður Fiskistofu mælir möskvastærð veiðarfæra

Veiðieftirlitsmenn Fiskistofu fylgjast með því að rétt sé að ýmsum málum staðið við skráningu afla og á hafnarvogunum en þeir gegna einnig margvíslegum öðrum eftirlitsstörfum. Eftirlit um borð í frystitogurum hefur farið vaxandi og þar fylgjast þeir með nýtingu í vinnslunni og annarri meðferð aflans. Eftirlitsmenn fylgjast einnig með veiðarfærum, samsetningu afla og meðferð um borð í veiðiskipum almennt. Þeir hafa aðgang að afladagbókum sem verða að tilgreina veiðistað, veiðidag, veiðarfæri og aflamagn. Eftirlitsmenn verða einnig varir við eða er tilkynnt um þau tilvik þegar mikið af smáum fiski eða seiðum er á miðunum og getur þá Hafrannsóknastofnun lokað þessum tilteknu svæðum tímabundið. Í landi fylgjast eftirlitsmenn einnig með veiðarfærum og aflasamsetningu og vinna að aldursgreiningu afla sem er liður í gagnasöfnun fyrir stofnmat Hafrannsóknastofnunar.

Loks er þess að geta að með tvíhliða samkomulagi Íslands og Evrópusambandsins er gert ráð fyrir að íslenskir eftirlitsmenn fari um borð í skip ESB á Íslandsmiðum til eftirlits og samningur Norðvestur-Atlantshafs fiskveiðinefndarinnar (NAFO) gerir ráð fyrir að þeir hafi eftirlit með afla um borð við allar veiðar sem NAFO er ábyrgt fyrir.