HEILNÆMI SJÁVARAFURÐA OG HAFIÐ UMHVERFIS ÍSLAND

Með vísindalegum rannsóknum hefur komið vel í ljós að Íslandsmið eru afar lítið menguð og að íslenskar sjávarafurðir eru heilnæmar og næringarríkar. Fjarlægðin til iðnaðarsvæða stórþjóða er mikil, íslenska þjóðin er fámenn og atvinnumál landsmanna sjálfra hafa ekki leitt til mengunar hafsins að neinu ráði. Það verður þó að hafa í huga að í rauninni er ekkert land óhult þegar mengun er annars vegar. Hafið umhverfis landið getur hæglega mengast af iðnaðarúrgangi sem berst frá fjarlægum slóðum og slík mengun getur smám saman spillt fiskimiðunum. Íslendingar verða einnig að gæta þess sjálfir að hafa verndun hafsins að leiðarljósi í allri atvinnustarfsemi sinni.

Á Íslandi er eldfjallavirkni og landið er efsti hluti   Mið-Atlantshafshryggjarins. Atlantshafið umlykur landið sem samkvæmt haffræðilegum og veðurfarslegum skilgreiningum er á mörkum heimskautasvæðisins og tempraða beltisins. Hér er vindasamt og á miðunum kringum landið ríkja aðstæður sem skapa mikla frjósemi lífsins í hafinu. Fylgjast verður vel með íslenska hafsvæðinu öllu til að tryggja hreinleika miðanna og um leið heilnæmi íslenskra sjávarafurða.

Vöktun Norður-Atlantshafsins og Norður-Íshafssvæðisins byggist á fjölþjóðlegum samningum og rannsóknaáætlunum vísindamanna en séríslensk rannsóknaverkefni skipta ekki síður miklu máli.

• Vöktun
• Sjávarafurðir